- حصة فاضية ...

جرس الحصة ضرب .. ضرب ...

طابور الصباح .. بداية حصة - نهاية حصة .. فسحة .. إنصراف ... كله جرس .. جرس ..جرس ...

هل هناك أى موظف يبدأ عمله وينهيه بجرس .. وكل كام دقيقة جرس آخر .. ينبىء بنهاية حصة وبداية حصة أخرى .. سوى المدرس !

بالطبع كله مضبوط بالدقيقة - مش زى الموظفين إياهم اللى لا لهم ضابط ولا رابط - وإذا فكر يزوغ ( ولو حصة ) .. يكون أمره مكشوف على رؤوس الأشهاد فى مدرسته بالكامل .

نرجع للجرس اللى ضرب من شوية ...ضرب الجرس .. هبت البنات من أماكنهن فى هرج ومرج ..

لم يعجبنى المنظر ... ثرت غاضباً ...

" كل واحدة فى مكانها . ياشوية ......... ، قلت ميت مرة .. نقفل البرنامج ، ونطفى الجهاز .. وتعدلى الكرسى اللى كنتى ........ عليه انتى وهى ".

إستجابة من الجميع على مضض ...

"أخيراً ... يالله بالسلامة .. يامحترمين ... وإقفلوا الباب وراكم ..."

- أووووف ... انتهت حصتين ، باقى حصتين ، ولكن للأسف بينهم حصة فاضية ..

طيب أقضيها إزاى ؟!

أنزل المكتبة ... ماليش مزاج للقراءة اليوم ..أنضم للزملاء فى حوش المدرسة ، ونضيع الحصة فى كلام مكرر لا يجيب ولا يودى ...أنظر أولاً من نافذة الغرفة ( معمل الكمبيوتر ) - التى تطل على حوش المدرسة مباشرة - لأستطلع من المتواجد هناك .. تلك النافذة التى كثيراً ماتابعت من خلالها أحداث المدرسة على مدى سنوات مضت بكل مافيها من مواقف وطرائف ...

فى حوش المدرسة ( الحوش الداخلى ) دكتين نص عمر - غالباً مشغولين بالمدرسين - طبعاً اللى عندهم حصة فاضية ..مشرف اليوم يحمل عصا ( خيزران ) طولها ييجى مترين .. يهش بها على الشارد والوارد من الأولاد فى الحوش .. لأنه من قواعد النظام فى المدرسة إن الحوش والطرقات مادامت خالية من الطلاب فالعملية التعليمية فى أحسن أحوالها ، وتلك صورة مشرفة لمشرف اليوم الدراسى ..

- مدرس يحمل حقيبته وعصاه الشهيرة .. ويهم بخطوات ثابتة الى فصله .. بصراحة رجل محترم ويشهد له الجميع بحسن الخلق ..

- مدرس من رواد الحوش ( تأبط ) ذراع زميله الآخر فى تثاقل على أمل أن يصلا الى حصتهما بعد ربع أو نصف الحصة ... مش مهم .. كله محصل بعضه .. المهم يكملوا الحديث الذى بدأوه من شوية .. طبعاً على السلم ثم الطرقة ثم أمام الفصل ده شوية وده شوية ..

- مدرس آخر ( معروف عنه التزويغ ) ترك جلسته بالحوش وإتجه الى الجناح الآخر من المبنى .. يمكن تكون وجهته ( الحمام ) .. يمكن الجمعية ..

- ( طبعاً دول رواد الحوش .. باقى المدرسين غالباً ينتقلوا من فصل الى آخر بصورة اوتوماتيكية .. بدلاً من النزول والصعود من والى الحوش .. ) ..

المشرف مرة أخرى فى حالة ( مكررة ) من الضيق والتذمر من الزملاء .. يصرخ فى حوش المدرسة .. يا إخوانا كل واحد على حصته .. والله حرام عليكم كده .. الحصة بدات بقالها 10 دقايق .. ونصف الفصول بدون مدرسين ..

- من حجرة المدرسات .. ظهرت مدرسة ثم الأخرى .. واضح انهن لم يتنبهن لصوت الجرس بالمرة ( أو تظاهرن بذلك ) .. كل واحدة تضم على صدرها مجموعة دفاترها ، وفى كتفها شنطة ضخمة .. وتهرولن كل على فصلها .. خوفاً من توجيه اللوم اليهن ..

- من طرف الحوش .. ظهر أخيراً مدير المدرسة .. طبعاً خرج على صوت المشرف الذى تنبه الجميع أخيراً الى صراخه .. وماإن وصل الى المكان حتى إنضم الى المشرف فى صراخه وتهليله ، وأخذ يسب ويلعن بكلام موجه للعموم .. ودون تحديد شخص بعينه ... حيث أنه دائم التعميم ، ويتراجع دائماً عن المواجهة المباشرة ..

- وبإنتهاء تلك الواقعة ( المكررة على مدى اليوم ) .. استتبت الأمور ، وصارت المدرسة بالكامل الى هدوء تام .

مدير المدرسة : للمشرف .. مين ياأستاذ ... اللى غايب عندك .. خد أساميهم ، وقفل عليهم حضور وانصراف ..

المشرف : الأستاذ ........ إستأذن من شوية بالتليفون لإن عنده ظروف .. والأستاذ ...... لسة ماجاش.. ودايماً بيتأخر ..

المدير : ياعم قفل على الكل .. الناس دى إتعودت على الفوضى ..

المشرف : الأستاذ ........ كان هنا دلوقتى ، وماطلعش حصته .. ماعرفش راح فين ؟؟

زميل آخر : أنا لسه شايفه فى المسجد .. بيصلى ركعتى الضحى ..

المدير : بيصلى وسايب الحصة .. بالزمة ده يرضى حد ياناس ...ياأستاذ : عندك كام فصل فاضى بدون مدرسين ؟

المشرف : خمس فصول ...

المدير : ليه فيه حد غايب تانى واللا ايه ..

المشرف : الأبلة ........ فى إجازة وضع بقالها اسبوعين ، وجدولها لسة ماتوزعش .. وفيه فصل ماأخدشى انجليزى من أول السنة .. مشغول بـ ( س ) فى الجدول .

المدير : شوف ياعم حد احتياطى يدخل الفصول دى ..

المشرف : ماحدش بيرضى يدخل إحتياطى .. أهم عندك أهم اللى فى المكتبة ، واللى فى الجمعية ، واللى فى حجرة المدرسين ( الأبلوات ) هناك بيتفرجوا على التليفزيون ..

المدير ... يدير وجهته الى مكتبه ، ويهمهم بكلمات غير مسموعة ..

* * *

- يدوب نصف الحصة انتهى ...

إلا وإحدى المدرسات صوتها خارج من الطابق الثانى ، وتستغيث بالمشرف ..

أيه ياأبلة اللى حصل ؟؟......................

يتبع ... ...